Bizkaia Kirolur 2026ko Europako Kirol Lurraldearen izendapena Europako Parlamentuaren egoitzan jaso du, Bruselan, Bizkaiko Foru Aldundiaren ordezkaritza batek, besteak beste, Carlos Sergio Kiroletako zuzendari nagusiak eta Javier de María Kiroletako zerbitzuburuak.

Izendapen horri esker, Bizkaiak aparteko urtea izango du kirolaren arloan, lurraldeko ohiko kirol-jarduera nabarmendu eta ikusaraziko baita; aldi berean, ekimen eta ekitaldi berriak bultzatuko dira, Bizkaiak pertsona guztientzat eta bizitzako etapa guztietan irisgarria izango den kirolarekiko duen konpromisoa indartzeko.

Hautagaitza martxoan aurkeztu zuen jendaurrean Ahaldun Nagusiak, Bizkaia Kirolak Sarien ekitaldian. Kirolur goiburupean — "kirol" eta"ur" zein "lur" hitzen bat-egitea, Bizkaia kirolerako lur gisa irudikatzen duena, bai itsasorako, bai barnealderako —, apustu sendoa kirolaren alde, kohesio sozialaren, osasun publikoaren eta garapen iraunkorraren eragile gisa.

Ondoren, maiatzean, Bizkaiak ACES Europe-ko ordezkaritza baten bisita jaso zuen, ebaluazio-prozesu zorrotz bat egiteko. Egonaldian, ordezkariek bertatik bertara ezagutu ahal izan zituzten lurraldeko kirol-azpiegiturak, eta antolakuntzak ezarritako irizpide zorrotzekin bat zetorrela baloratu ahal izan zuten.

ACES Europek Bizkaiak kirolaren balioekin duen konpromisoa baloratu zuen, eta gizarteratzeko, ongizatea hobetzeko eta herritarren bizi-kalitatea hobetzeko tresna gisa duen eginkizuna nabarmendu zuen. Kirolaren Europako Eskualde izendapena bultzada erabakigarria izango da lurraldean kirol-jarduera indartzeko eta Bizkaiko kirol- eta ongizate-eredua nazioartean proiektatzeko.